काठमाडौं । तीन साता पुगिसक्दा समेत जनप्रगतिशील मञ्च कतारका अध्यक्ष बुद्धिप्रसाद भण्डारीमाथि कुटपिटमा संलग्नलाई कारबाही नगरिएकोमा माओवादी केन्द्र प्रवासका नेताहरूले आपत्ति जनाएका छन् । उक्त घटनामा संलग्नहरूलाई कारबाही गर्न राजदूत नरेशविक्रम ढकाल अनिच्छुक देखिएको आरोप आन्दोलन गर्ने चेतावनी दिएका हुन् । 

माओवादी केन्द्रका केन्द्रीय सदस्य एवं प्रवासका सह–इन्चार्ज लक्ष्मण पन्तले घटनाको दोषीमाथि कारबाही गर्न राजदूत ढकाललाई पत्र पठाई सक्दासमेत पीडकलाई संरक्षण गर्ने काम गरेको आरोप लगाए । 

‘घटनामा संलग्नलाई कारबाही गर्न राजदूत अनिच्छुक देखिएका छन् । राजदूतले नै पीडकलाई संरक्षण गरेको जस्तो देखियो । घटनामा संलग्न जोसुकै भए पनि तत्काल कारबाही गर्न परराष्ट्रमन्त्री र दूतावासमा पत्र पठाएका छौँ । कारबाही नभए हामी राजदूत फिर्ता बोलाउनका लागि दबाबका कार्यक्रम बाध्य हुनेछौँ’, उनले भने । 

राजदूतको काम पीडकलाई संरक्षण गर्ने नभई दुःखमा परेका प्रवासी नेपालीहरूलाई सहयोग गर्नुरहेको पन्तले बताए । 

यसै गरी घटनामा संलग्नमाथि कारबाही नभए राजदूत फिर्ताका लागि दबाबमूलक कार्यक्रम ल्याउने जनप्रगतिशील मञ्च करताले चेतावनी दिएको छ । 

साउन ९ गते दूतावासमा गैरआवासीय नेपाली संघ (एनआरएनए) राष्ट्रिय समन्वय समितिमा आबद्ध नेपालीहरूबीच भएको विवाद कुटपिटको तहसम्म पुगेको थियो । 

एनआरएनएमै आबद्ध एक समूहको कुटाइबाट अध्यक्ष  भण्डारीको कानको जाली फुटेको थियो । एनआरएनए अभियन्ता शनिकुमार ओली र अर्का एकजना प्रभात त्रिपाठी सामान्य घाइते भएका थिए ।

Source-Ratopati